Acha_Message_New_Year.jpg

cement-1771678.jpg

መንግስት ከሲሚንቶ ምርት ግብይት አኳያ የሚታየውን ችግርና የዋጋ ንረት ለማረጋጋትና የምርት ስርጭቱን ቅደም ተከተል በማስቀመጥ ግብይቱን ግልጽና ተደራሽ ለማድረግ እንዲያስችል የአሰራር ስርዓት ዘርግቷል፡፡ በመሆኑም ከአዲስ አበባ ንግድ ቢሮ በተላከው የሲሚንቶ ምርት፣ ግብይትና ስርጭት መመሪያ መሰረት የኢትዮጵያ ንግድ ስራዎች ኮርፖሬሽን ለሲሚንቶ ምርት ፈላጊዎች ሽያጭ እያከናወነ ይገኛል፡፡

አስፈላጊውን መረጃ ላሟሉ ለመንግስት ግንባታ እና ለግል ገንቢዎች እንዲሁም ለብሎኬት አምራቾች ከነሐሴ 17/ 2014 ዓ.ም ጀምሮ ተግባራዊ የሆነ የሽያጭ ፕሮግራም ኮርፖሬሽኑ ያወጣ ሲሆን ተጠቃሚ የሚሆኑት ክፍለ ከተሞች ቂርቆስ፣ ልደታ፣ አዲስ ከተማ፣ ኮልፌ ቀራንዮ፣ ጉለሌ እና ንፋስ ስልክ ላፍቶ ናቸው፡፡ ከነሐሴ 17- 27/2014 ዓ.ም የቂርቆስ፣ የልደታ እና የአዲስ ከተማ ክፍለ ከተሞች ተጠቃሚ የነበሩ ሲሆን ከነሐሴ 28/ 2014 ዓ.ም ጀምሮ ደግሞ የኮልፌ ቀራንዮ ክፍለ ከተማ ተጠቃሚ በመሆን ላይ ይገኛል፡፡ የጉለሌ እና ንፋስ ስልክ ላፍቶ ክፍለ ከተሞች ደግሞ በመቀጠል በወጣላቸው ፕሮግራም መሰረት ተጠቃሚ ይሆናሉ፡፡

 

 

001_6.jpg

የኢትዮጵያ ንግድ ሥራዎች ኮርፖሬሽን አመራርና ሠራተኞች በአራተኛውን የአረንጓዴ አሻራ መርሃ ግብር “የገበያ ማረጋጊያ ሥራችንን እያጠናከርን አረንጓዴ አሻራችንን እናሣርፋለን” በሚል መሪ ቃል ሆለታ በሚገኘው የኮርፖሬሽኑ የግብይት ማዕከል የችግኝ ተከላ አካሂደዋል፡፡ ከተለያዩ የኮርፖሬሽኑ የንግድ ሥራ ዘርፎች የተውጣጡ ሠራተኞችና የሥራ ሃላፊዎች በተገኙበት ቅዳሜ ሀምሌ 23 ቀን 2014 ዓ/ም በተካሄደው መርኃ ግብር ላይ ከ1,300 በላይ የቅመማ ቅመም፣ የፍራፍሬ፣ የግቢ ውበትና የጥላ ዛፎች ተከላ የተካሄደ ሲሆን በተመሳሳይ መርኃ ግብሮችም በኮርፖሬሽኑ የተለያዩ ቅርንጫፍ ማዕከላት መሰል የተከላ መርሃ ግብሮች ተከናውነዋል፡፡

 

የኮርፖሬሽኑ ዋና ሥራ አስፈጻሚ አቶ አቻ ደምሴ በችግኝ ተከላ መርኃ ግብሩ ላይ እንደተናገሩት ኮርፖሬሽኑ በተለይም ካለፉት አራት በተካሄዱት አረንጓዴ ዐሻራ የማኖር አገራዊ ጥሪዎች የችግኝ ተከላና እንክብካቤ ክንውኖችን በስፋትና በተከታታይነት ሲያካሂድ መቆቱን አስታውሰው፤ እስካሁን በተካሄዱ የተከላ መርኃ ግብሮች ከተተሉት ችግኞች 84 በመቶው መጽደቃቸውን ገልጸዋል፡፡ በያዝነው ዓመትም ኮርፖሬሽኑ የተለያዩ የቅመማ ቅመም፣ የፍራፍሬ፣ የውበትና የጥላ ዛፎችን በሆለታ የግብይት ማዕከልና በሌሎችም የኮርፖሬሽኑ ቅርጫፍ ማዕከላት በማካሄድ ላይ እንደሚገኝ አስረድተዋል፡፡

 

የችግኝ ተከላ መርኃ ግብሩ በአካባቢ ጥበቃ ረገድ የደን ሽፋንን ለማሳደግ ብሎም አረንጓዴ ልማትን ለማረጋገጥ ከሚኖረው አስተዋጽዖ በተጨማሪ መልሰው ምርት መስጠት የሚችሉ ችግኞች የሚለሙበት በመሆኑ ጠቀሜታው የጎላ መሆኑን አስረድተዋል፡፡

 

የአረንጓዴ ልማት እንዲሳካ እንደ አገር ሰፊ ርብርብር እየተደረገ መሆኑን ያወሱት ዋና ሰራ አስፈጻሚው፤ በተለይም ዓለም አቀፍ ደረጃ በስፋት እየተስተዋሉ የሚገኙ የአየር ንብረት ለውጥ ተጽዕኖዎችን ለመቋቋም፣ ምርትና ምርታማነትን ለማሳደግና አፈር ለምነት እጦትን ለመከላከል የችግኝ ተከላ መርኃ ግብሩ ከፍተኛ ፋይዳ ያለው ከመሆኑ አኳያ ሁሉም በየአካባቢው ሥራውን በተገቢው መልኩ ለመከወን የሚያስችል በቂ ዝግጅት፣ ትግበራና ክትትል በማድረግ የበኩሉን የልማት አስተዋጽዖ እንዲወጣ ጥሪ አቅርበዋል፡፡

Evaluation.jpg

 

የኢትዮጵያ ንግድ ስራዎች ኮርፖሬሽን የበጀት ዓመቱ እቅድ አፈጻጸም ግምገማ ከነሐሴ 2-4/ 2014 ዓ.ም የኮርፖሬሽኑ ሥራ አስፈጻሚዎች፣ የዘርፎች ሥ/ አስፈጻሚዎችና እስከ ቡድን መሪ ያሉ የሥራ ሃላፊዎች በተገኙበት ተካሂዷል፡፡ ለሶስት ቀናት የተካሄደው መድረክ ዓላማ፣ በበጀት ዓመቱ ታቅደው የነበሩ ስራዎች ክንውን በመገምገም የነበሩ ጥንካሬዎችን አጠናክሮ ለማስቀጠልና የታዩ ችግሮችን ከምንጩ ለይቶ መፍትሄ በማስቀመጥ በ2015 በጀት ዓመት ውጤታማ ስራ ለመስራት ነው፡፡

በውይይቱ ለህብረተሰቡ በገበያ ማረጋጊያነት የሚቀርቡ መሰረታዊ የምግብ እህል ምርቶች፣ የፍጆታ ሸቀጦች፣ አትክልትና ፍራፍሬ አቅርቦት፣ ስርጭትና ተደራሽነት እቅድ አፈፃፀሙ ከደንበኞች ፍላጎት አንጻር መሆኑን የፋይናንስ ስራው በሲስተም በሚፈለገው ደረጃ IFRS ሂሳብ የመዝጋት አመታዊ የፋይናንስ ሪፖርትን በተሰጠ ግዜ ገደብ የማውጣት ሂደት ተከትሎ መሰራቱን እንዲሁም የሰው ሃብት ለማብቃት እና ሀብት አጠቃቀምን አሳድጎ ያለ ስራ የተቀመጡ ንብረቶችን አንቀሳቅሶ ውጤታማ ለማድረግ የተሰሩ ሥራዎች አፈፃፀም ላይ ትኩረት አድርጓል፡፡

የኮርፖሬሽኑ ዋና ስራ አስፈጻሚ አቶ አቻ ደምሴ ግምገማውን ሲያጠቃልሉ በአጠቃላይ በኮርፖሬሽን ደረጃ በዘርፎች፣ በዳይሬክቶሬቶች እና ጽ/ቤቶች በእቅድ አፈጻጸሞች ላይ የተደረገው ውይይት በባለቤትነት መንፈስ እና የኮርፖሬሽኑን ተልእኮ ለማሳካት እና ለህብረተሰቡ የምንሰጠውን አገልግሎት የበለጠ ውጤታማ ለማድረግ መካሄዱን ገልጸዋል፡፡ አያይዘውም በበጀት ዓመቱ በርካታ ውጤቶች መመዝገባቸውን ጠቁመው፣ ያልተሰሩ ስራዎች በድክመታችን አለመከናወናቸውን ተቀብለን ሁሉንም ችግር በአንዴ መፍታት ባይቻል ቅድሚያ ለሚሰጠው ጉዳይ ቅድሚያ እየሰጠን እንሰራለን ብለዋል ፡፡

የኢትዮጵያ ንግድ ሥራዎች ኮርፖሬሽን አብረውት ከሚሰሩ ደንበኞችና ባለድርሻ አካላት ጋር በአገልግሎት አሰጣጥ ዙሪያ የምክክር መድረክ ሰኔ 15/ 2014 ዓ.ም በአዲስ አበባ ከተማ በኢንተር ሌግዠሪ ሆቴል አካሄደ፡፡ በመድረኩ ላይ ከኮርፖሬሽኑ ጋር በገበያ ማረጋጊያ ስራዎች በትስስር የሚሰሩ ከንግድና ቀጠናዊ ትስስር ሚኒስቴር፣ ከግብርና ሚኒስቴር፣ ከአዲስ አበባ ንግድና ኢንዱስትሪ ቢሮዎች፣ ከፌዴራል ሕብረት ሥራ ኤጀንሲ፣ ከኢትዮጵያ ምርት ገበያ የተወከሉ የስራ ሃላፊዎች እንዲሁም ለኮርፖሬሽኑ ምርት እና አገልግሎት አቅራቢ የመንግስት እና የግል የንግድ ተቋማት ሸማች ህብረት ስራ ማህበራት ፣ የዱቄት ፋብሪካ ባለንብረቶች ተሳትፈዋል፡፡

በመድረኩ በቀረበው የውይይት የመነሻ ጽሁፍ በኮርፖሬሽኑ ንግድ ስራ ክፍሎች እና ኮርፖሬት ሎጅስቲክስ ዳሬክቶሬት በሚሰሩ የምርትና አገልግሎት እንቅስቃሴዎች ወቅት ያጋጠሙ ችግሮች እና በደንበኞችና መካከል ያለውን ግንኙነት ለማጠናከር የሚረዱ ሃሳቦች በኮርፖሬሽኑ የአሰራር ዘዴና አገልግሎት ማሻሻያ ዳ/ዳይሬክተር በሆኑት በአቶ ትእዛዙ ኃ/ጊዮርጊስ ቀርቧል፡፡
የመነሻ ጽሁፉን ተከትሎ ከመድረኩ ተሳታፊዎች ከኮርፖሬሽኑ የአገልግሎት አሰጣጥ ጋር በተያያዘ የተለያዩ አስተያየቶችና ጥያቄዎች ቀርበዋል፡፡

በውይይቱ ኮርፖሬሽኑ ለአርሶአደሩ እና ለሀገር ውስጥ የኢንዱስትሪ ፍጆታ እቃዎች አምራቹ የገበያ እድል መፍጠሩ & ከአዲስ አበባ ንግድና ኢንዱስትሪ ቢሮዎች ጋር በመቀናጀት መንግስት በድጎማ ለገበያ ማረጋጊያ የሚያቀርባቸውን የምግብ ዘይት እና ስኳር የሀገር ውስጥና የውጭ ስንዴ በተመደበለት ኮታ መሰረት ለህብረተሰቡ በሸማች ህብረት ስራ ማህበራት በማቅረብ ገበያን ለማረጋጋት ያደረገው ጥረት በተመሳሳይ በአቅርቦት እጥረት ምክንያት የተከሰተውን የሲሚንቶ ዋጋ ውድነት ለማረጋጋት በተመጣጣኝ ዋጋ ለህብረተሰቡ በመሸጥ አጋርነቱን ማሳየቱ የኮርፖሬሽኑ አመራር እና ሰራተኞች ለደንበኞች የሚሰጡት መስተንግዶ ጥሩ መሆኑ በጥንካሬነት ተገልጾል፡፡

እንደ ችግር ከተነሱት ጉዳዮች መካከል በስንዴ፣ የምግብ ዘይትና ስኳር የአቅርቦት መዘግየት መታየት፣ የሲሚንቶ አቅርቦት እጥረት፣ የፍጆታ ምርቶች ግብይት ላይ አስገዳጅ ምርቶችን ውሰዱ መባል የሚሉትን ጉዳዮችን ኮርፖሬሽኑ ከሚመለከታቸው አካላት ጋር በመነጋገር መፍትሄ እንዲፈለግ ተሳታፊዎቹ ጠይቀዋል፡፡

ለተነሱት አስተየየቶች የኮርፖሬሽኑ የሥራ ኃላፊዎች ምላሽና ማብራሪያ ሰጥተዋል፡፡ ኮርፖሬሽኑ ደንበኞቹና ባለድርሻ አካላት በሚጠብቁበት ደረጃ አገልግሎቱን ለመስጠት እና ባቀደው ዕቅድ ልክ አፈጻጸሙን ለማሳካት በሀገር ውስጥ በሚፈለገው መጠንና ዋጋ የእህል ምርት ገበያው ላይ አለመገኘት፣ በመንግሥት ድጎማ ለገበያ ማረጋጊያ ከውጭ ሀገር የሚገዛውና በኮርፖሬሽኑ የሚሰራጨው የውጭ ስንዴ ግዥ ጨረታ መስተጓጎል፣ ለገበያ ማረጋጊያ ከውጭ ለሚገዙ የፍጆታ ሸቀጥ ምርቶችም በውጭ ምንዛሪ እጥረት ፍላጎትና አቅርቦቱ አለመመጣጠን፣ ኮርፖሬሽኑ ለውጭ ገበያ የሚያቀርባቸው የቡና፣ የቅባት እህልና ጥራጥሬ ዋጋ በዓለም አቀፍ ደረጃ ካለው የገበያ ዋጋ መብለጥና የምርቶቹ ዋጋ መዋዠቅ ዋነኛ ችግሮች መሆናቸው በውይይቱ ወቅት ተብራርቷል፡፡ ኮርፖሬሽኑ የመንግስት የልማት ድርጅት እንደመሆኑ ወጪውን ራሱ እንደሚሸፍንና የትርፍ ህዳጉ ግን እጅግ ዝቅተኛ መሆኑ ተመላከቷል፡፡

የኮርፖሬሽኑ ዋና ሥራ አስፈጻሚ አቶ አቻ ደምሴ በውይይቱ ማጠቃለያ በመድረኩ የተሳተፉ አካላትን በማመስገን የተሰጡ አስተያየቶችን እንደ ግብአት ወስደን አገልግሎታችንን ይበልጥ ለማሻሻል እንጠቀምበታለን ብለዋል፡፡ መድረኩ በቀጣይም ተጠናክሮ እንደሚቀጥል ጠቁመዋል፡፡

በመጨረሻም የላቀ አጋርነት ላሳዩ ደንበኞች የእውቅና አሰጣጥ መርሃ ግብር የተካሄደ ሲሆን 13 ደንበኞች የእውቅና የምስክር ወረቀትና የዋንጫ ሽልማት ከኮርፖሬሽኑ ዋና ሥራ አስፈጻሚ አቶ አቻ ደምሴ እጅ ተበርክቶላቸዋል፡፡