የኢትዮጵያ የንግድ ሥራዎች ኮርፖሬሽን በአገራችን በግንባታው ዘርፍ ማነቆ ሆኖ የሚገኘውን የሲሚንቶ ዋጋ ንረትና የምርት እጥረት ለማረጋጋት የመንግሥት የልማት ድርጅቶች ምርቱን እንደዲያከፋፍሉ ግንቦት 21 ቀን 2012 ዓ/ም በንግድና ኢንዱስትሪ ሚኒስቴር በተደረሰው ውሳኔ መሠረት ምርቱን ከአገር ውስጥ አምራቾች በመግዛት በኮንስትራክሽን ሥራ ለተሠማሩ አካላት ማከፋፈል ጀምሯል፡፡

ኮርፖሬሽኑ የሲሚንቶ ምርትን በቀጥታ ከአምራች ፋብሪካዎች በተለይም በዋነኝነት ከዳንጎቴ፣ ደርባና ሙገር ሲሚንቶ ፋብሪካዎች በመግዛት ለአፋር ብሔራዊ ክልላዊ መንግሥት፣ ለጋምቤላ ብሔራዊ ክልላዊ መንግሥትና ለአዲስ አበባ አስተዳደር ለሚገኙ የመንግሥት ፕሮጀክቶች፣ ለክፍለ ከተሞችና በግንባታው ለተሠማሩ ሌሎች አካላት በማከናወን ላይ ይገኛል፡፡

በአገራችን እየተከሰተ ባለው የሲሚንቶ ዋጋ ንረት ምክንያት የኮንስትራክሽን ኢንዱስትሪው በከፍተኛ ደረጃ እየተጎዳ እንደሚገኝና ይህንን ለማስተካከል በንግድና ኢንዱስትረ ሚኒስቴርና በሲሚንቶ አምራች ኢንዱስትሪ ባለቤቶች መካከል ውይይቶች ሲደረጉ ቢቀይም ችግሩ ሊፈታ ካለመቻሉ በተጨማሪ በአንዳንድ አካባቢዎች ከፍተኛ የሆነ የሲሚንቶ ምርት እጥረት እየተከሰተ መሆኑን ከንግድ ሚኒስቴር የተገኘው መረጀ ያመለክታል፡፡

በመሆኑም ሚኒስቴር መሥሪያ ቤቱ ከአምራች ፋብሪካዎች፣ ከመንግሥት የልማት ድርጅቶች፣ ከክልሎችና ከከተማ አስተዳደሮች የንግድና ኢንዱስትሪ ቢሮ ኃላፊዎች ጋር ባደረገው ውይይት የመንግሥት የልማት ድርጅቶች የሲሚንቶ ምርትን በቀጥታ ከፋብሪካዎች በመግዛት እንዲያከፋፍሉ፤ አምራች ፋብሪካዎችም የሲሚንቶ ምርታቸውን በቀጥታ ለመንግሥት የልማት ድርጅቶች እንዲሸጡ በወሰነው መሠረት ነው ኮርፖሬሽኑ የማከፋፈል ሥራውን እየከወነ የሚገኘው፡፡

እስከ ሐምሌ 1 ቀን 2012 ድረስ ባለው ጊዜ ከ90 ሺህ በላይ ኩንታል ሲሚንቶ ለምርት ፈላጊዎች መከፋፈሉን ከሽያጭ ክፍሉ የተገኘው መረጃ ያመለክታል፡፡

የኢትዮጵያ የንግድ ሥራዎች ኮርፖሬሽን እና የኢፌዴሪ የግብርና ትራንስፎርሜሽን ኤጀንሲ በየዘርፈቸው ለሚያከናውኗቸውና የየተቋማቱን የሥራ አፈጻጸም ለማገልበት የሚረዱ መልካም ተሞክሮዎችንና ከምርትና ገበያ ጋር የተያያዙ መረጃዎችን ለመለዋወጥ የሚያስችላቸውን የመግባቢያ ሰነድ ጥቅምት 11 ቀን 2012 ዓ/ም በኢንሥኮ ዋና መሥሪያ ቤት ተፈራርመዋል፡፡

በስምምነቱ ተቋማቱ የተለያዩ የግብርና ምርቶችን የግብይት ዋጋዎችን እንዲሁም በመረጃዎች ላይ ተመሥርተው የተሚካሄዱ ጥናትና ጥናቶችንና ትንታኔዎችን ውጤቶች በመለዋወጥ በግብርናው ዘርፍ የሚሰሩ አካላትንና የአምራች አርሶ አደሮችን ተጠቃሚነት የሚያጎለብቱ መሆኑ በሰነዱ ላይ ተጠቅሷል፡፡

በዚህም መሠረት የኢትዮጵያ የንግድ ሥራዎች ኮርፖሬሽን በዋነኝነት የአነስተኛ አርሶ አደሮችን የማምረት አቅም ለማጎልበት የሚያስችሉ የግብርና ትራንስፎርሜሽን ድጋፎችን የማድረግ፣ በመረጃ ትንተና እና ጂአይኤስ ዙሪያ መልካ ተሞክሮዎች ከግብርና ትራንስፎርሜሽን የማግኘት እንዲሁም ከኤጀንሲው ጋር በመሆን የግብርና መረጃጃ አያያዝን የማዘመን ሥራዎችን ማከናወን የሚችልበት ዕድል እንደሚፈጥርለት ተገልጿል፡፡

በተመሣሣይም የግብርና ትራንስፎርሜሽን ኤጀንሲ በመረጃ በመረጃ ላይ የተመሠረቱ ውጤቶችን ለማግኘት የሚያስችሉ ወቅታዊ የመረጃ ግብዓቶችንና በኢንሥኮ የተተገበሩ የመረጃ አያያዝ መልካም ተሞክሮዎችን የሚያገኝባቸውን ስልቶች መተግበር የስምምነቱ አካል መሆናቸው ታውቋል፡፡

አነስተኛ አርሶ አደሮችም በወቅታዊና ትክክለኛ መረጃዎች ላይ ተመስርተው ከሚነደፉ ስትራቴጂዎች፣ ፖሊሲዎችና ፕሮጀክቶች ተጠቃሚ እንደሚሆን በስምምነቱ ሰነዱ ተመልክቷል፡፡

ደን ህይወት ነው፡፡ አዎ በእርግጥም ደን ህይወት ነው፡፡ ዓለማችንን እያስጨነቀ ያለው የአየር ንብረት ለውጥ መንስኤው የደን መመናመን ነው፡፡ ምድራችን ያለደን ውበት የላትም፡፡ ደን ስትለብስ ግን ግርማ ሞገሷን ትላበሳለች፤ እስትንፋሷም ይስተካከላል፡፡

ዕጽዋት የከተማችንን የአየር ንብረት ለመጠበቅም ሆነ አካባቢን ለማስዋብ ያላቸው ጠቀሜታ የጎላ ከመሆኑ አንጻር ችግኞችን መትከል የተተከሉትን ተንከባክቦ ማሳደግ ለአካባቢ ጥበቃ መሠረት ነው፡፡ በያዝነው በጀት አመት “አረንጓዴ አሻራ እናሳርፍ፤ በአንድ ጀምበር 200 ሚሊየን ችግኝ እንትከል!” በሚል መሪ ቃል በመላ ሀገሪቱ ሁሉንም የኅብረተሰብ ክፍል ያሳተፈ የችግኝ ተከላ እንቅስቃሴ ተጠናክሮ ቀጥሏል፡፡ መርኃ ግብሩ በዋናነት ሐምሌ 22 ቀን 2011 ዓ/ም የሚከናወን ሲሆን እንቅስቃሴው ቀድሞ ተጀምሯል፡፡ ይህ መርኃ ግብር የሀገሪቱን የደን ሽፋን ትርጉም ባለው መልኩ አንድ እርምጃ ወደ ፊት የሚያራምድ መሆኑ በብዙዎች ተስፋ ተጥሎበታል፡፡

የኢትዮጵያ ንግድ ሥራዎች ኮርፖሬሽን የሥራ ኃላፊዎችና ሠራተኞች ይህንን ሀገራዊ አጀንዳ ተቀብለው ሀምሌ 6 ቀን 2011 ዓ/ም ሳሪስ በሚገኘው የኮርፖሬሽኑ የእህል ማከማቻ ቅጥር ግቢ ውስጥ የችግኝ ተከላ ፕሮግራም አካሂደዋል፡፡

በችግኝ ተከላው ወቅት የኮርፖሬሽኑ ኮርፖሬት ሰርቪስ ምክትል ዋና ሥራ አስፈጻሚ አቶ ታሪኩ በራሱ መርሃ ግብሩን አስመልክተው ደን ከሰው ልጆች ህይወት ጋር ቀጥተኛ ትስስር ያለውና ከደማችን ጋር የተያያዘ መሆኑን በመጥቀስ ንጹህና ያልተራቆተ አካባቢን ለቀጣዩ ትውልድ ማስተላለፍ ያሳሰቡ ሲሆን ችግኞችን መትክል ብቻ ሳይሆን የተተከሉትም እንዲጸድቁ ተገቢውን እንክብካቤ ማድረግ እንደሚገባ በመጠቆም መልዕክት አስተላልፈዋል፡፡

ኮርፖሬሽኑ በአካባቢ ጥበቃ ፕሮግራሙ የችግኝ ተከላን በዋና መሥሪያ ቤቱና በክልል የግብይት ማዕከላት የነደፈ ሲሆን የኮርፖሬሽኑ የሥራ ኃላፊዎችና ሠራተኞች የአካባቢ ፕሮግራሙን ተግባራዊ ማድረግ ከጀመሩ ዓመታትን አስቆጥረዋል፡፡

ዘንድሮም የተሣተፉት የሥራ ኃላፊዎችና ሠራተኞች በዕለቱ የተተከሉትን ችግኞችም ሆነ የቀደሙትን ተንከባክበው ለፍሬ እንደሚያበቁ በችግኝ ተከላ ፕሮግራሙ ላይ ቃል ገብተዋል፡፡